2Sa 20 | NdeIBE | STEP | Ngalesosikhathi kwenzakala ukuthi umxabanisi owayethiwa nguSheba indodana kaBhikhiri umBhenjamini abe khona. Wakhalisa icilongo waklabalala esithi, “Kasilasabelo kuDavida, kasilangxenye endodaneni kaJese! Umuntu wonke ethenteni lakhe, O Israyeli!”

2 Samuel 20

USheba uhlamukela uDavida

1 Ngalesosikhathi kwenzakala ukuthi umxabanisi owayethiwa nguSheba indodana kaBhikhiri umBhenjamini abe khona. Wakhalisa icilongo waklabalala esithi, “Kasilasabelo kuDavida, kasilangxenye endodaneni kaJese! Umuntu wonke ethenteni lakhe, O Israyeli!”

2 Ngakho bonke abantu bako-Israyeli bahlubuka kuDavida balandela uSheba indodana kaBhikhiri. Kodwa abantu bakoJuda babambelela enkosini yabo ummango wonke kusukela eJodani kusiya eJerusalema.

3 UDavida esebuyele esigodlweni sakhe eJerusalema, wathatha abafazi bakhe beceleni abalitshumi ayebatshiye begcine isigodlo wababeka endlini elindwayo. Wabanika ababekuswela, kodwa kembathanga labo. Babehlala bevalelwe kuze kube lusuku lokufa kwabo, baphila njengabafelokazi.

4 Inkosi yasisithi ku-Amasa, “Biza abantu bakoJuda beze kimi phakathi kwezinsuku ezintathu, lawe ube lapha wena ngokwakho.” 5 Kodwa u-Amasa eseyebiza uJuda, wathatha isikhathi eside kulaleso inkosi eyayimmisele sona.

6 UDavida wasesithi ku-Abhishayi, “Khathesi uSheba indodana kaBhikhiri uzasenzela umonakalo odlula owenziwa ngu-Abhsalomi. Thatha abantu benkosi yakho umlandele, hlezi athole amadolobho avikelweyo aphunyuke kithi.” 7 Ngakho abantu bakaJowabi lamaKherethi lamaPhelethi kanye lamaqhawe wonke alamandla baphuma belawulwa ngu-Abhishayi. Bahamba besuka eJerusalema belandela uSheba indodana kaBhikhiri.

8 Kwathi besesedwaleni elikhulu eGibheyoni, u-Amasa wayabahlangabeza. UJowabi wayegqoke ibhatshi lakhe lempi, phezu kwalo, ekhalweni lwakhe, kubophe ibhanti lilomhedla esikhwameni sawo. Esahamba esiya phambili, umhedla wawela ngaphandle kwesikhwama sawo.

9 UJowabi wasesithi ku-Amasa, “Unjani, mfowethu?” UJowabi wasebamba u-Amasa ngendevu ngesandla sakhe sokudla wasemanga. 10 U-Amasa kawunanzelelanga umhedla owawuphethwe nguJowabi, uJowabi wawutikitela esiswini sakhe, amathumbu akhe ahutshukela phandle emhlabathini. Lanxa engasagwazwanga futhi, u-Amasa wafa. Emva kwalokho uJowabi lomfowabo u-Abhishayi baxotshana loSheba indodana kaBhikhiri.

11 Omunye wabantu bakaJowabi wema phansi kuka-Amasa wathi, “Lowo othanda uJowabi, lalowo ongokaDavida, kalandele uJowabi!” 12 U-Amasa walala ebhixeka egazini lakhe phakathi komgwaqo, umuntu lowo wabona ukuthi amabutho wonke afika ame khonapho. Kwathi esenanzelele ukuthi umuntu wonke owafika ku-Amasa wema, wamhudula emsusa emgwaqweni wamusa egangeni, waphosela isambatho phezu kwakhe. 13 Emva kokuba u-Amasa esesusiwe emgwaqweni, abantu bonke bedlula loJowabi ukuyaxotshana loSheba indodana kaBhikhiri.

14 USheba wadabula phakathi kwazo zonke izizwana zako-Israyeli kusiya e-Abheli Bhethi Mahakha laphakathi kwesifunda sonke samaBheri, aqoqanayo amlandela. 15 Wonke amabutho ayeloJowabi afika amvimbezela uSheba e-Abheli Bhethi Manakha. Bakha idundulu lokuvimbezela elalifika edolobheni njalo laleyame izinqaba zangaphandle. Besagqula umduli ukuba bawudilize,

16 owesifazana ohlakaniphileyo wamemeza esedolobheni wathi, “Lalelani! Lalelani! Tshelani uJowabi eze lapha ukuze ngikhulume laye.” 17 Wahamba esiya kuye, wasembuza esithi, “UnguJowabi na?” Yena waphendula wathi, “Nginguye.” Wasesithi, “Lalela okuzatshiwo yincekukazi yakho.” Wathi, “Ngilalele.”

18 Owesifazana waqhubeka wathi, “Kudala babejwayele ukuthi, ‘Funani impendulo e-Abheli,’ lokho kwakuyiqeda indaba. 19 Thina singabathuleyo labathembekileyo ko-Israyeli. Wena uzama ukudiliza idolobho elingunina ko-Israyeli. Kungani ufuna ukuginya ilifa likaJehova na?”

20 UJowabi waphendula wathi, “Akusikho lokho! Akusikho lokho ukuginya loba ukudiliza!

21 Akunjalo. Umuntu othiwa nguSheba indodana kaBhikhiri, owaselizweni lezintaba lako-Efrayimi, uphakamisele inkosi isandla sakhe emelana layo, emelana loDavida. Mletheni umuntu lowo, ngisuke edolobheni.” Owesifazana wathi kuJowabi “Ikhanda lakhe lizaphoswa kuwe lisuka emdulini.

22 Emva kwalokho owesifazana lowo waya ebantwini bonke leseluleko sakhe esikhaliphileyo, baquma ikhanda likaSheba indodana kaBhikhiri baliphosela kuJowabi. Ngakho wakhalisa icilongo, abantu bakhe bachitheka besuka edolobheni, lowo lalowo ebuyela emzini wakhe. UJowabi wabuyela enkosini eJerusalema.

23 UJowabi wayephethe lonke ibutho lako-Israyeli; uBhenayiya indodana kaJehoyada ephethe amaKherethi lamaPhelethi; 24 u-Adoniramu wayephethe izibhalwa; uJehoshafathi indodana ka-Ahiludi wayengumbhali; 25 uSheva engumabhalane; uZadoki lo-Abhiyathari bengabaphristi; 26 u-Ira umJayiri engumphristi kaDavida.